Im hinderä Täil vum Madranertal liit  d Alp Schteessi uf 1180 Meter obä. Ä Wanderwäg ziäht si lengs vum Chärschtäläbach vu Brischtä üs bis zur Alp. Das beliäbti Erholigsgebiät het mit dr Hüfihittä ä idealä Üsgangspunkt fir uf diä umliigedä Schteck üfäzchlätterä. D Schteessi isch Häüptschtafel fir sibä Älplerfamiliä üs  Brischtä. Diä hent si zur Alpgnossäschaft Schteessi zämägschlossä.

I dr Alpchääserii verwärtet si d Milch vu rund 60 Chiäh. D Gnossäschaft produziärt im Jahr rund säx Tonnä Chääs, schpeziell Mutschlichääs, wo mit verschidenä Produktä veretlet wärdet wiä eppä Paprika, Chnoplech oder Schnittläüch. Züäsätzlich wird nu uf dr Alp Joghurt, Alpankä, Nitlä und Ziger härgschtellt. Diä Produkti wärdet mehrhäitlich uf dr Alp verchäüft.